Dakarun runduna ta 8 ta sojojin Najeriya tare da jami’an tsaron farin kaya da na Sibil Difens da kuma ‘yan banga a safiyar Talata sun kai farmaki kan wani sansanin ‘yan ta’adda a jihar Kabbi.
Sojojin, a yayin samamen, sun kashe ɗaya daga cikin ‘yan ta’addan, tare da kubutar da mutane huɗu da aka yi garkuwa da su, tare da kwato makamai da alburusai.
Mukaddashin Daraktan Hulda da Jama’a na Rundunar Sojoji ta Birgediya ta 1 a Gusau Kaftin Yahya Ibrahim ne ya bayyana hakan, yana mai cewa, “An kai samamen ne a maboyar ‘yan ta’addan da ke kauyen Sabon Gari da ke karamar hukumar Shanga a Jihar Kebbi.
“A yayin farmakin, sojoji sun kashe daya daga cikin ‘yan ta’addan tare da zakulo wadanda aka yi garkuwa da su hudu.
“Sojojin sun kuma kwato bindigu kirar AK-47 guda uku, gidan alburusai uku, harsashi na musamman 142 mai tsawon milimita 7.62mm da kaki guda biyu.”
Ya kara da cewa duk wadanda aka ceto sun samu haɗuwa da dangoginsu, yayin da sojoji ke ci gaba da bin diddigin wadanda suka samu raunuka da kuma tserewa daga cikin ‘yan ta’addar.
