Rundunar yan sandan jihar Kogi ta ce jami’an ta sun samu nasarar kuɓutar da wasu fasinjoji huɗu daga hannun masu garkuwar da mutane bayan da aka yi awon gaba da su akan titin Ayingba zuwa Ankpa a ranar Lahadi.
A wata sanarwa rundunar ta ce DPO na caji ofis din yan sanda dake Egume ne ya samu kiran kai daukin gaggawa da misalin karfe 06:00 na yamma dake cewa an ga wasu motoci biyu yashe a gefen titi babu mutane a ciki.
Jami’an tsaro da suka isa wurin sun gano motocin guda biyu ɗaya kirar Hyundai Sonata mai rijistar nambar Abuja YAB 821 ES da kuma kirar Toyota Camry mai rijistar nambar Kano DKD 137 AA.
A cewar jami’an tsaro motocin na kan hanyarsu ne ta zuwa garin Ankpa daga Ayingba lokacin da yan ta’addar suka tsare musu hanya ta hanyar buɗe musu wuta kana daga bisani suka tasa keyar mutanen ya zuwa cikin daji.
Kwanson harsashin bindiga kirar AK-47 guda 14 aka samu wurin inda nan take DPO na Egume ya ƙaddamar da aikin kuɓutar da mutanen ta hanyar bin sawun yan bindigar abun ya kai ga kubutar da mutane 4.
Waɗanda aka kuɓutar din sun hada da Cletus Chen sai maidakinsa Joy Cletus da kuma ƴaƴansu biyu dukkansu na tafiya ne a cikin mota kirar Camry.
Rundunar ƴan sandan ta tabbatar da cewa bata samu nasarar gano ragowar mutane ukun dake cikin daya motar.
