Yan bindiga sun sako iyalan da su ka yi garkuwa da su a A Kaduna

Ma’aurata da aka yi garkuwa da su, wato Ahmed Abubakar Zakka, matarsa da kuma ‘yarsu mai watanni shida,Fatima , sun sake samun ‘yancinsu.

A cewar wasu majiyoyi, an sake su  ne a ranar Alhamis, kuma suna kan hanyarsu ta komawa cikin birnin Kaduna a lokacin da ake tattara wannan rahoto.

Har yanzu ba a bayyana cikakkun bayanai na  game da yadda aka samu sakinsu ba, amma wani tsohon jami’in tsaro da ke aiki tare da tawagarsa domin ganin an kuɓutar da su ya tabbatar wa wakilin jaridar Daily Trust  faruwar lamarin.

Mutumin, wanda ya buƙaci a ɓoye sunansa, ya ce iyalan da  aka sako suna kan hanyarsu ta komawa gida a cikin wata mota tare da direbansa.



“Eh, suna kan hanyarsu ta dawowa gida tare da direbana. Ƙoƙarin da tawagata da wasu mutane masu zaman kansu suka yi ne ya haifar da sakinsu,” in ji shi.

An yi garkuwa da Zakka matarsa da kuma ‘yarsu mai watanni shida daga gidansu da ke Millennium City , a Ƙaramar Hukumar Chikun ta Jihar Kaduna, a ranar 6 ga watan Oktoba, 2026

Bayan kwanaki kaɗan da faruwar lamarin, wani bidiyo da ke nuna Zakk da ‘yarsa a hannun masu garkuwa da mutane ya bazu a kafafen sada zumunta, lamarin da ya haifar da fushi da Allah-wadai daga al’umma a faɗin ƙasar.