

Wata gobara da ta tashi a ranar Asabar ta kama wasu sassan Gidan Rediyon Tarayyan Najeriya na Kaduna (FRCN), Tashar Yankin Kaduna. Gobara ta fara ne a daidai lokacin da wasu manyan ma’aikatan gidan rediyon ke gudanar da jarabawar karin girma.
Har zuwa lokacin hada wannan rahoto, ba a tantance musabbabin gobarar da ta fara da rana ba.
Gobarar ta shafi dakunan watsa shirye-shirye na Karama FM, sabuwar tashar Supreme FM da aka gyara kwanan nan, da kuma wasu sassan Sashen Hausa na gidan rediyon.
Daily Trust ta tattaro cewa wasu manyan ma’aikata daga jihohin Arewa maso Yamma da sauran ofisoshin shiyyoyi sun kasance a tashar domin yin jarabawar karin girma lokacin da lamarin ya faru.
An ga jami’an hukumar kashe gobara suna kokarin shawo kan gobarar domin hana ta yaduwa zuwa sauran sassan tashar.
Tashar ta kuma sanar da faruwar lamarin a shafinta na Facebook da aka tabbatar da sahihancinsa.
“Wasu daga cikin manyan ma’aikatanmu na gudanar da jarabawar karin girma a harabar tashar lokacin da muka ga hayaki na fitowa daga bangaren Karama FM da sabuwar tashar Supreme FM da aka gyara.
“Ba zan iya tabbatar da ko gobarar ta shafi Sashen Hausa ba, amma wannan yankin ma ya cika da hayaki,” a cewar wani ma’aikacin tashar.
Wani ma’aikaci daban ya tabbatar da faruwar lamarin, yana mai cewa Darakta Janar na hukumar, Mohammed Bulama, yana tashar lokacin da gobarar ta tashi.
Ma’aikacin wanda ya nemi a sakaya sunansa ya bayyana lamarin a matsayin abin damuwa, yana mai cewa tashar tana fuskantar wasu ƙalubale tun kafin wannan gobara, sannan ya nuna fatan za a dauki matakan gaggawa domin gyara barnar da aka samu.
“An kammala gyaran Supreme FM ne kwanan nan karkashin jagorancin mahukunta, yayin da ake ci gaba da gyaran wasu sassan tashar kafin wannan gobara ta afku. Yanzu da wannan gobara, ba mu san tsawon lokacin da zai dauka kafin tashar ta dawo yadda take ba,” in ji shi.
Da aka tuntubi Mukaddashin Daraktan Yankin tashar, Aminu Abdullahi, ta wayar tarho, ya ki yin karin bayani, yana mai cewa jami’an kashe gobara na ci gaba da kokarin shawo kan gobarar.