
Mataimakin dan takarar shugaban kasa na jam’iyyar NDC, Rabiu Musa Kwankwaso, ya bayyana dan takarar shugaban kasar jam’iyyar, Peter Obi, a matsayin mutum mai gaskiya wanda ba ya da alaka da cin hanci da rashawa.
Kwankwaso ya bayyana hakan ne a ranar Asabar, yayin bikin yaye dalibai karo na biyar na Jami’ar Skyline da ke Kano.
Ya ce a cikin watannin da suka shafe suna aiki tare, ya lura da cewa Obi ba mutum ne da ake alakanta shi da cin hanci ba, yana mai cewa wannan hali na da matukar muhimmanci wajen tafiyar da mulki a Najeriya.
Kwankwaso ya kuma yi alkawarin cewa gwamnatin NDC za ta bai wa ilimi fifiko, tare da kokarin samar da ilimi kyauta domin tabbatar da cewa babu yaron da zai kasa zuwa makaranta saboda rashin kudin makaranta.
Ya ce shi da Obi suna da ra’ayi iri daya kan harkar ilimi, kuma suna da burin kawar da halin da yara ke ciki na yawon bara domin neman abin da za su ci.
A nasa jawabin, Peter Obi ya yi alkawarin farfado da masana’antun da suka durkushe a Kano domin bunkasa tattalin arziki da samar da ayyukan yi.
Obi ya bayyana Kano a matsayin muhimmiyar cibiyar tattalin arzikin Najeriya, yana mai cewa duk wani shiri na farfado da tattalin arzikin Arewa da kasar baki daya ya kamata ya fara daga jihar.