Ƴan Bindiga Sun Fille Kan Wani Mutumi Ɗan Shekara 60 Tare Da Kona Gawarsa

Muhammadu SabiuHausa37 minutes ago



Wasu ‘yan bindiga sun kashe wani mutum mai shekaru 60, mai suna James Edi Diwa, ta hanyar harbe shi, yanke kansa tare da kona gawarsa da babur dinsa a karamar hukumar Boki ta Jihar Cross River.

An ce lamarin ya faru ne a ranar 12 ga Nuwamba, 2026, lokacin da marigayin ke tuka babur a kan hanyar Isobendeghe zuwa Boje.

Rahoton Daily Trust ya bayyana cewa maharan sun harbe Diwa, suka yanke kansa, sannan suka banka wa gawarsa da babur dinsa wuta.

Kisan ya faru ne a daidai lokacin da ake ci gaba da samun takaddamar filaye tsakanin al’ummomin Isobendeghe da Boje, wadanda ke makwabtaka da juna a karamar hukumar Boki, kuma suka dade suna fama da rikici mai nasaba da filaye.

Matar marigayin, Mrs Schola Abang, ce ta kai rahoton kisan ofishin ‘yan sanda na sashen Boki da safiyar ranar da ta biyo bayan faruwar lamarin.

Jami’in hulda da jama’a na rundunar ‘yan sandan jihar, ASP Eitokpah Sunday Akata, ya ce jami’an tsaro sun ziyarci wurin da lamarin ya faru bayan samun rahoton, sannan suka fara gudanar da bincike na farko.

Ya kara da cewa rundunar ta kaddamar da farautar wadanda ake zargi da aikata kisan.

A cikin wata sanarwa da ya fitar ranar Alhamis, Akata ya ce kwamishinan ‘yan sandan jihar, Ajo Geoffrey Ordue, ya umarci sassan da abin ya shafa da su kara kaimi wajen gudanar da bincike domin gano wadanda suka aikata laifin.

Ya bayyana cewa har zuwa lokacin fitar da sanarwar, ba a kama wani mutum dangane da lamarin ba.

Kwamishinan ‘yan sandan ya yi Allah-wadai da kisan, tare da kira ga mazauna yankin da su kwantar da hankalinsu, su kuma taimaka wa jami’an tsaro da sahihan bayanan da za su taimaka wajen gudanar da bincike.

Loading

Signing-in 3 seconds...

Signing-up 3 seconds...