Tinubu Ya Sake Alƙawarin Rage Kudin Sufurin Jama’a a Najeriya da Kashi 40

Muhammadu SabiuHausa28 minutes ago



Shugaban Kasa Bola Ahmed Tinubu ya sake jaddada kudirin gwamnatinsa na rage kudin sufuri a Najeriya, ta hanyar shirin shigo da motocin bas masu amfani da iskar gas ta CNG da kuma hada su a cikin kasar.

Wannan na zuwa ne bayan wani alkawari da shugaban ya taba yi na rage kudin sufuri a fadin kasar kafin 1 ga Oktoba, 2026.

A karkashin sabon shirin, kamfanin Yutong na kasar China, wanda ke kan gaba wajen kera motocin bas masu amfani da wutar lantarki da CNG, zai kafa masana’antar hada motocin bas din CNG a Najeriya.

Mai ba shugaban kasa shawara kan harkokin yada labarai da dabaru, Bayo Onanuga, ne ya bayyana hakan a cikin wata sanarwa da ya fitar ranar Alhamis.

Sanarwar ta ce wannan zuba jari zai taimaka wajen aiwatar da shirin sufuri mai saukin kudi na kasa (NACTP), wanda ake gudanarwa tare da gwamnatocin jihohi, da nufin rage kudin mota da kusan kashi 40 a hanyoyin da shirin ya shafa.

A karkashin yarjejeniyar da aka cimma da shirin shugaban kasa kan motocin CNG da masu amfani da lantarki (Pi-CNG & EV), Yutong zai fara samar da motocin bas 300, inda ake sa ran motocin farko 100 za su isa Legas kafin karshen Disamba 2026.

Za a rika hada sauran motocin a Najeriya ta kamfanin YP Automobiles Bus Assembly, a tsohuwar masana’antar Leyland da ke Ibadan, Jihar Oyo.

Gwamnatin ta ce wannan mataki zai farfado da masana’antun cikin gida, rage dogaro da motocin da ake shigowa da su daga kasashen waje, tare da samar da ayyukan yi ga injiniyoyi, kwararrun masu fasaha da sauran ma’aikata.

Tinubu ya ce zuba jarin zai taimaka wajen tabbatar da samun motocin kasuwanci masu saukin kudi, da kuma bunkasa fasahar kere-kere da masana’antar kera motoci a Najeriya.

Ya jaddada cewa nasarar shirin CNG za a auna ta ne bisa yadda zai rage kudin da ‘yan Najeriya ke kashewa wajen sufuri, yana mai cewa dole ne rage kudin gudanar da motocin ya haifar da saukin kudin mota ga fasinjoji.

Shugaban ya kuma bayyana cewa miliyoyin ‘yan Najeriya na dogaro da motocin haya wajen zuwa wuraren aiki, kai yara makaranta, zuwa kasuwanni da jigilar kayayyaki tsakanin al’ummomi.

A cewarsa, rage kudin sufuri zai bai wa ma’aikata, ‘yan kasuwa da iyalai damar ajiye wani bangare na kudaden shigarsu domin biyan bukatun yau da kullum, kamar abinci da ilimi.

Loading

Signing-in 3 seconds...

Signing-up 3 seconds...