
Hakeem Jeffries ya kafa tarihi bayan jam’iyyar Democrat ta zaɓe shi a matsayin ɗan takararta na shugabancin Majalisar Wakilan Amurka, matakin da zai iya ba shi damar zama baƙar fata na farko da ya jagoranci majalisar.
Jeffries, mai shekara 56, wanda ke wakiltar jihar New York, ya samu ƙuri’u 251 a zaɓen cikin gida na jam’iyyar da aka gudanar a ranar Laraba, yayin da mambobi 11 suka ƙi amincewa da takararsa, a cewar rahotannin kafafen yaɗa labaran Amurka.
Nasarar tasa ta biyo bayan gagarumar nasarar da Democrat ta samu a zaɓen tsakiyar wa’adin mulki, wanda ya ba jam’iyyar rinjaye a Majalisar Wakilan Amurka.
Ana sa ran Jeffries zai karɓi shugabancin majalisar a ranar 3 ga Janairu, lokacin da sabuwar majalisa za ta fara zama. Sai dai dole ne mambobin majalisar su tabbatar da zaɓensa ta hanyar jefa ƙuri’a.
Idan aka tabbatar da shi, zai zama baƙar fata na farko da ya jagoranci majalisar, wadda ke ɗaya daga cikin manyan cibiyoyin ikon gwamnatin Amurka.
Bayan zaɓensa, Jeffries ya nuna cewa jam’iyyarsa za ta tsaurara sa ido kan gwamnatin Shugaba Donald Trump, tare da gudanar da bincike kan zarge-zargen aikata ba daidai ba a cikin gwamnati.
Ya ce, “Za mu yi ƙoƙari don tabbatar da cewa, duk da cin hanci da rashawa, hargitsi da rashin tausayi da ba a taɓa ganin irinsa ba da aka jefa wa al’ummar Amurka, ’yan majalisar Democrat za su hukunta masu laifi, ba don siyasa ba, sai don kishin ƙasa, domin al’ummar Amurka sun cancanci abin da ya fi haka.”
Tuni ’yan Democrat suka fara shirye-shiryen gudanar da bincike kan wasu jami’an gwamnatin Trump da kuma harkokin kasuwancin shugaban ƙasar kafin su karɓi ragamar majalisar a watan Janairu.
Robert Garcia, babban ɗan Democrat a Kwamitin Sa Ido na Majalisar, ya bayyana cewa ya aika wasiƙu 12 ga wasu ’yan gidan Trump da manyan jami’an gwamnatinsa, inda ya buƙace su da su adana takardun da za su iya zama hujjoji yayin binciken zarge-zargen cin hanci da rashawa, take haƙƙin bakin haure da kuma yadda aka kula da bayanan da suka shafi Jeffrey Epstein, wanda aka yanke wa hukunci kan laifukan lalata.
Garcia ya ce, “Wannan ma farkon lamarin ne.”
Duk da cewa babu wani ɗan jam’iyyar da ya fito takara a hukumance domin hamayya da Jeffries, zaɓen ya bayyana bambancin ra’ayoyin da ke tsakanin ’yan Democrat kan yadda za su yi amfani da rinjayen da suka samu a majalisar.
Wasu sabbin mambobin jam’iyyar masu ra’ayin ci gaba sun nemi a ɗauki matsaya kan batutuwa kamar tallafin sojin Amurka ga Isra’ila da kuma yadda gudummawar kuɗi ke ƙara yin tasiri a harkokin siyasa.
Kafin zaɓen, Jeffries ya tattauna da wasu daga cikin waɗannan mambobi, inda ya yi alƙawarin mayar da hankali kan hauhawar tsadar rayuwa, wadda ta kasance ɗaya daga cikin manyan batutuwan yaƙin neman zaɓen jam’iyyar.
Ya ce, “Saƙonmu ga al’ummar Amurka da ke fama da matsin tattalin arzikin wannan gwamnati shi ne: muna jin ƙorafinku, muna ganin halin da kuke ciki, muna fahimtar damuwarku, kuma ’yan majalisar Democrat sun ƙuduri aniyar inganta rayuwarku.”
An haifi Jeffries kuma ya girma a unguwar Crown Heights da ke Brooklyn, New York. Ya karanci shari’a kafin ya fara harkokin siyasa a Majalisar Dokokin Jihar New York a 2007, sannan aka zaɓe shi zuwa Majalisar Wakilan Amurka a 2012.
An san shi da iya gabatar da jawabai cikin natsuwa, ƙwarewar muhawara da kuma yawan amfani da misalai daga waƙoƙin hip-hop da mawakan wannan salo.
A 2022, Jeffries ya sake kafa tarihi bayan zama baƙar fata na farko da ya jagoranci wata jam’iyya a ɗaya daga cikin majalisun dokokin Amurka, lokacin da ya maye gurbin Nancy Pelosi a matsayin shugaban marasa rinjaye a Majalisar Wakilan.
Haka kuma, ya taka muhimmiyar rawa a shari’ar tsige Trump ta farko a 2020, inda ya kasance cikin ’yan majalisar da suka gabatar da hujjojin tuhuma a kansa.
Idan aka tabbatar da shi a matsayin shugaban majalisar, Jeffries zai jagoranci Majalisar Wakilan a shekaru 2 na ƙarshe na wa’adin mulkin Trump. Haka kuma, zai zama na biyu a jerin waɗanda za su gaji shugabancin ƙasar idan shugaban ƙasa ya kasa ci gaba da mulki, bayan mataimakin shugaban ƙasa.
Sai dai ana sa ran zai fuskanci ƙalubale wajen daidaita ra’ayoyin ’yan jam’iyyarsa masu matsakaicin ra’ayi da masu ra’ayin ci gaba, tare da ƙoƙarin aiwatar da manufofin jam’iyyar.
Haka kuma, zai fuskanci ikon Trump na yin watsi da dokokin da Majalisa ta amince da su, lamarin da ka iya kawo cikas ga ƙoƙarin Democrat na zartar da dokokin da gwamnatin shugaban ƙasar ba ta goyon baya.