Ƴan kwangila sun ya bawa gwamna Uba Sani

Gwamnan Kaduna, Uba Sani, ya samu yabo saboda yadda ya ɓullo  da tsarin biyan bashin da ya gada daga gwamnatin da ta gabata ta hanyar biya kowane wata.

Yayin da yake jawabi bayan taron da aka gudanar tsakanin manyan jami’an gwamnati da shugabannin Ƙungiyar ‘Yan Kwangila a jihar Kaduna, shugaban ƙungiyar, Ahmed Baba, ya bayyana cewa gwamnan ya gaji bashi mai yawa daga gwamnatin da ta gabace shi.

Baba ya ce gwamnan ya nuna cewa mulkin gwamnati ɗorawa ake kan na baya, ta hanyar ɗaukar matakin biyan bashin da aka tabbatar da sahihancinsa.

A cewarsa, tsarin biyan kowane wata zai tabbatar da cewa bashin da aka gada an biya shi a hankali, kuma zai rage wa ‘yan kwangila nauyin kuɗi da suka sha wahala bayan kammala ayyukan da suka yi wa jihar Kaduna.

“Duk da ya gaji bashi mai yawa, Mai Girma  gwamna ya nuna jagoranci na gaskiya. Ya bayyana a fili cewa gwamnati ɗorawa ake daga inda ta baya ta tsaya, kuma ‘yan kwangila ba za su sha wahala ba saboda hidimar da suka yi wa jihar,” in ji Baba.

“Tsarin biyan kowane wata da gwamnan ya amince da shi, wata hanya ce ta ceton rayuwa ga yawancin mambobinmu.”

Shugaban ya ce tun bayan fara mulkin Uba Sani, ba a taɓa bin bashin ‘yan kwangila da ke gudanar da ayyukan da gwamnatin yanzu ta ba su ba.

Baba ya yaba da ƙoƙarin gwamnan tare da yin alkawarin goyon bayan shirin ci gaban ababen more rayuwa na gwamnatin.

Ya kuma yi kira ga ‘yan kwangila da su ci gaba da yin aiki mai inganci da kammala ayyuka akan lokaci domin nuna godiya ga kyakkyawan matakin da gwamnan ya ɗauka.