An samu ambaliyar ruwa a wasu sassan birnin Fatakwal

Sassa da dama na Fatakwal babban birnin jihar Rivers, sun fuskanci ambaliya biyo bayan mamakon ruwan sama da aka tafka a ranar Lahadi. 

Bidiyoyi da ke yawo a yanar gizo sun nuna yadda ruwan ambaliyar ya kai wa mutane har sama da ƙugun su yayin da suke ƙoƙarin ceto kayansu. 

Wuraren da abin ya shafa sun haɗa da titin Chiomana a Rukpokwu, wasu sassan hanyar Aba expressway, titin Peter Odili, Ozuoba da sauransu. 

Motoci da dama sun nutse, yayin da aka ga wasu magidanta suna kwaso ruwa daga gidajensu. An kuma ruwaito cewa wasu turakun lantarki sun lalace sakamakon ambaliyar. 

Ambaliyar ta katse harkokin ilimi da na zamantakewa a yankin. Rahotanni sun bayyana cewa wasu mahalarta taron biki sun yi carko-carko bayan da ambaliyar ta mamaye inda suke gudanar da taron.

Tarin shara da najasa da ke shawagi a cikin ruwan ambaliyar ya ƙara tayar da hankalin jama’a kan yiwuwar barkewar cututtuka. 

An danganta ambaliyar da ruwan sama mai ƙarfi tare da matsalolin tsara muhalli, toshe hanyoyin ruwa da kuma zubar da shara ba bisa ka’ida ba da yawancin mazauna  garin ke yi. 

An kuma danganta ambaliyar da gina wuraren da a da suke tun asali hanyar ruwa ne. 

Wasu mazauna unguwannin da abun ya faru sun roki gwamnatin jihar da ta taimaka musu, suna cewa ba su da inda za su je yayin da ruwan ambaliya ya ci gaba da mamaye gidajensu.