Kotu ta yankewa  mutane huɗu hukuncin kisa kan garkuwa da mutane a jihar Edo

Kotun musamman dake hukunta  manyan  laifuka ta jihar Edo ta yanke hukuncin kisa ga mutane hudu bisa laifin sace wata mata a kasuwar kayan lambu da ke kan titin  zuwa filin jirgi a garin Benin babban birnin jihar Edo.

Alkalin  kotun mai shari’a Aigbona Momodu, a ranar Talata ya same su da laifi a kan tuhumar da ta ƙunshi aikata laifuka 11  ciki har da satar mutane, haɗin baki, fashi da makami, shiga ƙungiyar asiri da kuma mallakar makamai ba bisa ka’ida ba.

Wadanda aka yanke wa hukunci sun hada da Marvellous Isaac, Wisdom Michael, Rufus Emete Michael da Gift Raphael.

An sace matar ne a ranar 14 ga Yuni, 2026.

A yayin yanke hukunci, Alkalin ya ce ba shi da wani zaɓi illa ya aiwatar da hukuncin mafi tsanani da doka ta tanada a kan waɗanda ake tuhuma.

• Isaac, wanda shi ne na farko, an yanke masa hukuncin kisa ta hanyar rataya ko allurar guba a kan tuhume-tuhume guda 2 zuwa 9. Haka kuma an yanke masa shekaru 10 a kurkuku a kan tuhuma ta10 da kuma daurin rai-da-rai akan tuhuma ta 11.
• Wisdom Michael, wanda shi ne na biyu, ya samu irin wannan hukuncin kisa a kan tuhume-tuhume guda 2 zuwa 9.
• Rufus Emete Michael, wanda shi ne na uku, an yanke masa hukuncin kisa a kan tuhume-tuhume 2, 3, 6 da 7.
• Gift Raphael, wanda shi ne na hudu, ya samu hukuncin kisa kan tuhume-tuhume na 2, 4, 6 da 8.

Alkalin ya kuma umarci a kwace bindiga da harsashi da aka samo daga hannun su, a mika wa gwamnatin tarayya, sannan a lalata su cikin kwanaki 30.

Wannan shi ne hukuncin farko da kotun musamman ta Edo ta yanke tun bayan kafa ta a watan Yuni.

A watan Yuni ne Babban Alkalin jihar Edo, Daniel Okungbowa, ya kafa kotun musamman domin shari’ar laifukan shiga ƙungiyar asiri da satar mutane, a matsayin mataki na yaki da aikata manyan laifuka.

Kotun ta samo asali ne daga bukatar da gwamnan jihar, Monday Okpebholo, ya gabatar.