Kwankwaso: Tinubu Ya Haɗa Kan ’Yan Siyasar Da Ba Sa Jituwa Da Juna

Wani jigo a jam’iyyar APC, Dr Musa Illiyasu Kwankwaso, ya ce Shugaba Bola Tinubu ya samu goyon bayan ’yan siyasar da a baya suke hamayya da juna, gabanin babban zaɓen Najeriya na 2027.

Kwankwaso ya bayyana hakan ne ranar Alhamis, inda ya ce shigar ’yan siyasa daga jam’iyyu daban-daban cikin kwamitin yaƙin neman zaɓen Tinubu na nuna cewa shugaban ƙasar na samun goyon baya fiye da na jam’iyyarsa ta APC.

Ya ce ƙaddamar da kwamitin ya yi kama da taron murna da sake zaɓen Tinubu, yana mai cewa haɗuwar ’yan siyasar da a baya ba sa amincewa da juna alama ce ta irin goyon bayan da shugaban ƙasar ke samu.

A cewarsa, kasancewar ’yan siyasa daga jam’iyyu irin su APGA, Labour Party, PDP da Accord Party a cikin tafiyar na nuna cewa tushen goyon bayan Tinubu na ƙaruwa.

Kwankwaso ya ce ba kasafai ake samun yanayin da ’yan siyasa daga mabambantan jam’iyyu, ciki har da waɗanda ba sa iya zama tare, suke haɗuwa domin mara wa ɗan takara guda baya ba.

Ya kuma kare manufofin tattalin arzikin Tinubu, yana mai cewa kalaman Gwamnan Jihar Anambra, Farfesa Chukwuma Charles Soludo, da sauran shugabannin siyasa sun nuna fahimtar ƙalubalen da Najeriya da tattalin arzikin duniya ke fuskanta.

Jigon na APC ya ce zaɓen 2027 bai kamata a kalle shi a matsayin batun makomar siyasar Tinubu kaɗai ba. Ya yi kira da a sake ba shugaban ƙasar wa’adi na biyu domin ya ƙarfafa sauye-sauyen tattalin arzikin da gwamnatinsa ta fara, duk da matsalolin da ’yan Najeriya ke fuskanta.