Yan sanda sun yi karin haske kan yadda aka yi garkuwa da yan NYSC a jihar Imo

Rundunar ‘Yan Sandan  Jihar Imo ta bayyana cewa wasu daga cikin waɗanda aka yi garkuwa da su a kan hanyar Owerri-Onitsha da safiyar ranar Alhamis sun haɗa da matasa masu yiwa ƙasa hidima wato NYSC.

Mai magana da yawun rundunar ‘yan sandan jihar, Okoye Henry, ya ce an ceto mutane 10 daga cikin waɗanda aka sace. Ya ce  kawo yanzu ana cigaba da tantance adadin mutanen da aka yi garkuwa da su  kuma za a sanar da jama’a da zarar an tabbatar. 

Rahotanni sun bayyana cewa da misalin ƙarfe 6:30 na safe, ‘yan bindiga sun tare motoci biyu masu ɗaukar fasinjoji 18-18, suka yi wa fasinjojin fashi sannan suka tafi da su cikin daji. Bidiyo da ya bazu a shafin sada zumunta X ya nuna cewa fasinjojin suna kan hanyarsu ta  zuwa jihohin Akwa Ibom da Abia a cikin motocin da aka yi wa alamar gwamnatin Abia lokacin da aka tare su. 

Okoye ya tabbatar da cewa ‘yan NYSC sun kasance cikin waɗanda aka yi garkuwa da su. 
“Lamarin ya faru da misalin ƙarfe 06:30 na safe, ranar 1 ga Oktoba, 2026, a kan titin Owerri-Onitsha, kusa da Umunoha. Motoci biyu masu ɗaukar ‘yan NYSC da sauran fasinjoji daga Ibadan zuwa Uyo (Akwa Ibom) da Bende (Abia) aka kai wa hari da ake zargin ‘yan bindiga da kai wa,” a cewarsa


“Bayan gaggawar martani daga ‘yan sanda da sauran jami’an tsaro, an dawo da motocin biyu kuma an ceto mutane 10 a wurin. Waɗanda aka ceto suna cikin koshin lafiya kuma ana kula da su. Adadin mutanen da aka yi garkuwa da su ana ci gaba da tantancewa.” 

Okoye ya ce jami’an tsaro suna ci gaba da gudanar da bincike da aikin ceto tare da amfani da bayanan sirri don gano inda ‘yan bindigar suke da kuma kubutar da sauran mutanen. Ya ce kwamishinan ‘yan sanda na Imo tare da sauran shugabannin tsaro sun ziyarci wurin domin duba lamarin da kuma bayar da umarnin aikin kuɓutar da mutanen

Ya tabbatar da cewa rundunar za ta ci gaba da aikin har sai an kubutar da dukkan mutanen da aka sace kuma an gurfanar da masu laifin a gaban shari’a. 

Rundunar ta ce tana aiki tare da hukumar NYSC don sanar da iyalan waɗanda abin ya shafa. Haka kuma ta bayyana cewa an buɗe sashen titin da abin ya faru kuma zirga-zirga ta ci gaba, yayin da jami’an tsaro ke nan don kare masu tafiya. 

Rundunar ta yi kira ga jama’a da su kwantar da hankalinsu, su kasance masu lura, kuma duk wanda ke da sahihin bayani ya kai rahoto ga ofishin ‘yan sanda mafi kusa ko ya kira layin gaggawa na rundunar.