Yan sanda sun dakile harin ƴan bindiga a Sokoto

‘Yan sanda a Jihar Sokoto sun daƙile wani hari da ‘yan bindiga suka yi ƙoƙarin kaiwa a Tsabre dake ƙaramar hukumar Isa, inda suka kwato bindigogi biyu na harba roka da wasu kayan yaki.

Mai magana da yawun ‘yan sanda, DSP Ahmad Rufa’i, ya bayyana hakan a cikin wata sanarwa da aka fitar a ranar Juma’a, inda ya ce harin ya faru da misalin ƙarfe 1 na dare, lokacin da ‘yan bindigar suka fara harbi ba tare da kakkautawa ba domin tsoratar da mazauna yankin.

Ya ce DPO na Isa ya hanzarta tura tawagar musamman, ciki har da  jami’an  rundunar dake yaki da masu garkuwa da kuma aikata manyan laifuka bayan  da ya samu kiran kai ɗaukin gaggawa.

A cewarsa, jami’an ‘yan sanda sun yi musayar wuta da ‘yan bindigar, lamarin da ya tilasta musu guduwa zuwa dajin kusa da yankin tare da raunata wasu daga cikinsu.

Daga baya, tawagar ta yi bincike a dajin da ke kusa, inda suka gano bindigogi biyu na harba roka, gidan zuba harsashi biyu na AK-47 marasa harsashi, wayar Tecno mai maɓalli ba tare da batir ba, da fitila.

Sauran abubuwan da aka kwato sun haɗa da hular soja ta daji, hular sanyi, takalma guda biyar, da rigar ruwan sama.

Mai magana da yawun ‘yan sandan ya ce kwamishinan ‘ƴan sandan jihar Hayatu Hassan Shaffa, ya yaba wa jami’an bisa gaggawa da jarumtaka da suka nuna a yayin aikin.

Ya kara da cewa kwamishinan ya jaddada kudirin rundunar wajen kare rayuka da dukiyoyin jama’a a jihar.

Rundunar ta yi kira ga mazauna yankin da su kasance masu lura da kuma bayar da rahoton duk wani motsi ko mutanen da ke da raunukan harbin bindiga da suka nemi magani a asibiti mafi kusa.