Kotu ta yanke wa matashi hukuncin kisa a Kogi

Wata Babbar Kotu a birnin Lokoja, babban birnin jihar Kogi, ta yanke wa wani matashi mai suna Dahiru Yusuf Abba, mai shekaru 24, hukuncin kisa ta hanyar rataya.

Kotun ta same shi da laifin kashe mahaifinsa, Dahiru Yusuf, a yankin Sarkin-Noma da ke Lokoja.

Da yake yanke hukuncin, mai shari’a M.M. Gwatana ya ce an samu matashin da laifin ne ƙarƙashin sashe na 221 na dokokin shari’ar jihar Kogi.

Rahotanni sun ce an kama Dahiru Yusuf Abba a ranar 4 ga watan Oktoban 2024, sannan aka gurfanar da shi a gaban kotu bisa zargin kisan kai da aikata mugun laifi.

An zarge shi da caka wa mahaifinsa wuka a ƙirji da baya bayan wani saɓani da ya faru tsakaninsu.

Sai dai lauyoyin matashin sun bayyana cewa za su ɗaukaka ƙara kan hukuncin kotun.