Shugaban Ƙasa Bola Ahmed Tinubu ya gargadi ‘yan bindiga, masu garkuwa da mutane da masu tallafa wa ta’addanci da su mika wuya ko kuma su fuskanci matakin hukuma mai tsauri.
Tinubu ya yi wannan gargadi ne a jawabin da ya gabatar ga al’umma a ranar Alhamis domin bikin cika shekaru ashirin da bakwai na mulkin dimokuraɗiyya a Najeriya.
Ya ce gwamnatin sa za ta ci gaba da haɗa matakan soji da shirye-shiryen gyaran hali ga waɗanda suka ajiye makamansu, amma ya jaddada cewa damar mika wuya ba za ta kasance a buɗe har abada ba.
Shugaban ya bayyana cewa sama da mayaƙa dubu goma sha uku sun mutu a ayyukan tsaro cikin shekara guda, yayin da sama da mutane dubu dari da ashirin da huɗu tare da iyalansu suka mika wuya ta shirin Operation Safe Corridor tun daga shekarar dubu biyu da ashirin da uku.
Ya kuma yi kira ga ‘yan Najeriya su kasance cikin haɗin kai wajen yaƙi da rashin tsaro, yana mai cewa laifi ba ya da ƙabila, kuma gwamnati za ta ci gaba da kare rayuka da dukiyoyin al’umma.
Tinubu Ya Gargadi ‘Yan Bindiga Da Masu Tallafa Wa Ta’addanci Su Mika Wuya
