Wani mai tabin hankali ya kai farmaki inda ya kashe mutane takwas tare da raunata wasu da dama a unguwar Kate-Gamji da ke unguwar Libbo a karamar hukumar Shelleng a jihar Adamawa.
An bayyana cewa mutumin mai suna Ali Denham, ya yi amfani da wuka ne wajen far wa wasu mazauna garin a daren ranar Laraba, inda ya kashe mutane takwas tare da raunata wasu uku kafin daga bisani wasu su kashe shi.
Da yake tabbatar da faruwar lamarin a ranar Asabar, kakakin rundunar ‘yan sandan jihar Adamawa, Sulaiman Nguroje, ya gargadi iyalai kan ajiye mahaukata a gida lokacin da ya kamata a kwantar da su a asibitocin masu tabin hankali.
Ya ce ‘yan sanda sun fara bincike kan lamarin. A halin da ake ciki, shugaban karamar hukumar Shelleng, Abubakar Musa Abba, ya kai ziyarar jaje ga iyalan wadanda suka rasu, inda ya bukace su da su dauki asarar da suka yi a matsayin daga Allah.
