Gwamnatin Gombe Ta Bayyana Barkewar Kwalara, Ta Yi Wa Marasa Lafiya 74 Magani

Gwamnatin jihar Gombe ta ayyana barkewar cutar kwalara a kauyen Kedo, mazabar Todi da ke karamar hukumar Billiri, bayan rahotannin gudawa da amai da suka yi sanadin mutuwar mutane biyu a ranar 4 ga Oktoba, 2026.

Kwamishinan Lafiya na jihar, Farfesa Adamu-Danladi Bojude, ne ya bayyana hakan a wani taron manema labarai da aka gudanar a Gombe ranar Laraba. Ya ce an yi wa mutane 74 da suka kamu da cutar magani kuma an sallame su, yayin da babu wanda ke kwance a asibiti a lokacin taron.

Bojude ya ce gwamnatin jihar ta tura tawagar gaggawa domin taimaka wa jami’an lafiya na karamar hukumar wajen gudanar da bincike da kuma bayar da magani kyauta ga wadanda abin ya shafa a cibiyar lafiya ta matakin farko da ke Sheila.

Ya kara da cewa jihar ta shafe kwanaki bakwai a jere ba tare da samun sabon rahoton kamuwa da cutar ba, har zuwa ranar 21 ga Oktoba. A cewarsa, idan ba a samu sabon kamu ba zuwa ranar 24 ga Oktoba, za a ayyana kawo karshen wannan barkewar.

Kwamishinan ya yi gargadin cewa kwalara cuta ce da ake iya kamuwa da ita ta hanyar amfani da gurbataccen abinci ko ruwa, kuma tana iya yin sanadin mutuwa cikin sa’o’i idan ba a samu kulawar lafiya da ta dace ba.

Ya bukaci jama’a su kiyaye tsaftar abinci, jiki da muhalli, tare da gaggauta kai duk wanda ake zargin ya kamu da cutar zuwa asibiti mafi kusa. Ya tabbatar da cewa za a bayar da magani kyauta ga wadanda ake zargin sun kamu da kwalara.