Yan bindiga sun kashe wani jami’in ɗan sanda a jihar Filato

Yan bindiga sun kashe wani jami’in ɗan sanda akan hanyarsa ta zuwa wurin aiki a hanyar Kwi- Beco, wani garin da ke tsakanin ƙananan hukumomin Riyom da Barikin Ladi a Jihar Plateau.

Majiyoyi sun bayyana cewa lamarin ya faru ne da misalin ƙarfe 7 na yammacin ranar Alhamis.

Wannan al’amari ya zo ne a daidai lokacin da ake fuskantar matsanancin tashin hankali a ƙananan hukumomin Mangu, Bokkos da Barikin Ladi, inda gwamnati ta sanya dokar hana fita domin kwantar da tarzomar rikice-rikicen da ke faruwa.

Wakilin jaridar Daily Trust ya ruwaito cewa jami’in tsaron da abin ya rutsa da shi yana tafiya ne a kan babur zuwa wurin aikinsa a yankin Chit da ke Gundumar Heipang lokacin da aka kai masa hari aka kashe shi.

Majiyoyi sun ce maharan sun kuma yi abin gaba da  baburin da yake hawa bayan sun kashe shi.

Mai magana da yawun ƙungiyar  matasan Berom ta Berom Youth Moulders-Association (BYM), Rwang Tengwong, ya tabbatar da faruwar lamarin, tare da bayyana shi a matsayin abin damuwa matuƙa.

Tengwong ya nuna alhininsa kan cewa kashe jami’in tsaro ya ƙara jefa shakku game da tsaron rayuka da dukiyoyin fararen hula a yankunan da abin ya shafa.

Ya ce ƙungiyar ta damu ƙwarai da yadda jami’an tsaron da aka tura domin kare al’umma su ma ke fuskantar hare-hare da barazana ga rayuwarsu.

Mai magana da yawun BYM ya yi Allah-wadai da kisan, sannan ya yi kira ga hukumomi da su ɗauki matakan gaggawa domin magance matsalolin tsaro da ke addabar al’ummomin yankin.

Mai magana da yawun rundunar ‘yan sandan jihar, DSP Alabo Alfred, bai amsa saƙon neman ƙarin bayani daga wakilin jaridar  ya aika masa ba har zuwa lokacin da ake tattara wannan rahoto.

Jaridar ta Daily Trust ta ruwaito cewa duk da sanya dokar hana fita a baya-bayan nan, hare-hare da kashe-kashe na ci gaba da faruwa a jihar.