Amaechi: Masu Zaben Tinubu A 2027 Mahaukata Ne

Tsohon gwamnan Jihar Rivers kuma mataimakin dan takarar shugaban kasa na jam’iyyar ADC, Rotimi Amaechi, ya ce mutanen da za su zabi Shugaba Bola Tinubu a zaben 2027 “mahaukata” ne.

Amaechi ya bayyana hakan ne yayin wani taron tattaunawa da masu ruwa da tsaki na ADC a Jihar Edo, inda ya bukaci al’ummar jihar su ki zabar Tinubu a zaben shugaban kasa mai zuwa.

Ya ce, “Mahaukata ne kawai za su zabi Tinubu. Idan mutanen Edo suka zabi Shugaba Tinubu, hakan na nufin mutanen Edo mahaukata ne. Idan ba mahaukata ba ne, bai kamata Tinubu ya yi nasara a nan ba.”

Tsohon ministan sufuri ya kuma zargi Tinubu da fifita moriyar kansa kan bukatun ’yan Najeriya, musamman dangane da shirin gina wata sabuwar tashar jiragen ruwa a Jihar Ogun.

Amaechi ya tambayi irin kayayyakin da ake samarwa a Ogun da za su tabbatar da bukatar karin tashoshin jiragen ruwa, yana zargin cewa ribar da za a samu daga aikin gina tashar ce ta sa aka dauki matakin.

Ya kuma bukaci magoya bayan ADC da sauran masu son sauyin gwamnati su koma mazabunsu domin shiga harkokin zabe, tare da tabbatar da cewa an kare kuri’unsu.

Amaechi ya yi gargadin cewa jami’an zabe na iya karkatar da sakamako, don haka ya bukaci masu kada kuri’a su sa ido sosai yayin tattara da sanar da sakamakon zabe.

Kalaman Amaechi na zuwa ne yayin da jam’iyyun siyasa da ’yan adawa ke kara shirye-shiryen tunkarar babban zaben Najeriya na 2027.