Gwamnatin Gombe Ta Biya ’Yan Fansho Hakkokinsu Na Naira Biliyan 10.32

Gwamnatin Jihar Gombe ta fara biyan kuɗin giratuti na Naira biliyan 10.32 ga ma’aikatan gwamnati 6,665 da suka yi ritaya a matakin jiha da ƙananan hukumomi.

Gwamna Muhammadu Inuwa Yahaya ne ya bayyana hakan ranar Alhamis yayin ƙaddamar da kashi na shida na biyan kuɗin giratuti tun bayan hawansa mulki a shekarar 2019.

Gwamnan ya ce an ware Naira biliyan 6.24 domin biyan ’yan fanshon gwamnatin jiha da suka yi ritaya a shekarun 2024 da 2025, yayin da aka fitar da Naira biliyan 4.08 domin taimaka wa ƙananan hukumomi wajen biyan basussukan giratuti.

Ya ce mutane 2,354 da suka yi ritaya daga gwamnatin jiha da kuma 4,311 daga ƙananan hukumomi ne za su amfana da kuɗin.

Yahaya ya bayyana cewa lokacin da gwamnatinsa ta karɓi mulki a 2019, ta gaji bashin giratuti na Naira biliyan 21 da ake bin tsoffin ma’aikatan jiha da ƙananan hukumomi.

Ya ce kafin sabon biyan kuɗin, gwamnatinsa ta riga ta biya Naira biliyan 33.283, wanda ya sa jimillar kuɗin giratuti da ta biya tun 2019 ta kai Naira biliyan 44.134.

Gwamnan ya ƙara da cewa an kammala biyan dukkan basussukan giratuti na ma’aikatan gwamnatin jiha har zuwa Disambar 2025, yayin da za a biya waɗanda suka fara taruwa daga Janairun 2026 a farkon shekarar 2027.

Haka kuma, ya sanar da biyan Naira miliyan 299 ga tsoffin ma’aikatan Gombe Investment and Property Development Company, bayan rushe kamfanin da kafa sabuwar hukumar bunƙasa zuba jari ta jihar.

Yahaya ya ce gwamnatinsa na nazarin samar da tsari mai ɗorewa domin hana sake taruwar basussukan giratuti, yayin da ya bayyana cewa an kuma ɗauki malamai 1,000, ma’aikatan lafiya sama da 440 da wasu ma’aikata domin biyan buƙatun hukumomin gwamnati.