Sojoji Sun Kama Dan Siyasar Yobe Kan Zargin Taimaka Wa Ƴan Ta’adda

Dakarun Sojojin Najeriya sun kama wani dan siyasa a Jihar Yobe, Wakiil Mama, wanda aka fi sani da Mai Salati, bisa zargin taimaka wa kungiyar ta’addanci ta ISWAP da kayan aiki da sauran tallafin dabaru.

Rahoton TheCable, wanda ya nakalto wallafar Zagazola Makama mai bibiyar harkokin yaki da ta’addanci a yankin Tafkin Chadi, ya ce an kama dan siyasar ne bayan zargin yunkurinsa na ba sojoji cin hanci domin su saki wasu mutanen da aka kama a Kanamma, Yobe, bisa zargin samar wa ’yan ta’adda kayayyakin tallafi.

Rahoton ya ce kwamandan rundunar Sector 2 tare da dakarun 27 Task Force Brigade ne suka gudanar da aikin kama shi bisa bayanan sirri.

An ce sojojin sun kama wadanda ake zargin suna samar da kayan tallafi ga ’yan ta’adda, kuma ana shirin ci gaba da bincikensu lokacin da Mai Salati ya yi zargin yunkurin ba jami’an kudi domin a sake su.

Maimakon karbar kudin, sojojin sun kama shi tare da fara shirye-shiryen mika shi ga hukumomin tsaro a Maiduguri, babban birnin Jihar Borno, domin zurfafa bincike da yiwuwar daukar matakin shari’a.

Rahoton ya kara da cewa an daga shi da sauran wadanda ake zargin daga Damaturu zuwa Maiduguri, inda ake sa ran za a yi musu tambayoyi domin gano ko suna da alaka da hanyoyin samar wa ISWAP kayayyaki da sauran tallafi.

Majiyoyin tsaro da rahoton ya nakalto sun ce matakin ba shi da alaka da siyasa, sai dai ya samo asali ne daga zargin tallafa wa ’yan ta’adda da yunkurin kawo cikas ga binciken wadanda ake zargi.