INEC: ’Yan Najeriya Sama Da Miliyan 103 Za Su Iya Kada Kuri’a A Zaben 2027

Hukumar Zabe Mai Zaman Kanta ta Kasa (INEC) ta ce adadin wadanda aka yi wa rajistar kada kuri’a a Najeriya ya haura miliyan 103, bayan kammala aikin rajistar masu kada kuri’a da kuma tantance bayanan masu rajistar.

Shugaban INEC, Farfesa Joash Amupitan, ne ya bayyana hakan a Abuja yayin wani taron horaswa na musamman da aka shirya wa editoci, yana mai cewa rajistar ta karu ne bayan samun sabbin masu rajista 10,772,421 a matakai uku na aikin Continuous Voter Registration (CVR).

Ya ce INEC ta kammala tantance bayanan ta hanyar Automated Biometric Identification System (ABIS), inda adadin rajistar masu kada kuri’ar kasar ya haura miliyan 103.

Amupitan ya kuma sanar da cewa za a fara rabon katunan PVC ga masu kada kuri’a a fadin kasar daga Jumma’a, 9 ga Oktoba, 2026, bayan an rarraba katunan mataki na farko zuwa cibiyoyin kananan hukumomi.

Shugaban INEC ya ce hukumar ta kuma sayi sabbin na’urorin BVAS guda 57,000, wadanda aka inganta manhajarsu, batir da tsarin tantance bayanan yatsa domin karfafa sahihancin tantance masu kada kuri’a da rage damar magudi.

Ya ce hukumar na kokarin ganin an fara kada kuri’a a lokaci guda a dukkan rumfunan zabe a fadin Najeriya a zaben 2027, tare da inganta kayan aiki, ma’aikata da tsarin jigilar kayayyakin zabe.

Amupitan ya kuma gargadi masu hannu da shuni a siyasa kan sayen kuri’u, yana mai cewa INEC za ta hada kai da hukumomin yaki da cin hanci da rashawa da sauran hukumomi domin sa ido kan kudaden yakin neman zabe da yunkurin sayen kuri’u.

Zaben shugaban kasa da na Majalisar Dokoki ta Kasa na 2027 an tsara gudanar da shi ne a 16 ga Janairu, 2027, yayin da zaben gwamnoni da majalisun dokokin jihohi zai gudana a 6 ga Fabrairu, 2027.