Sojoji Sun Ceto Mutane Biyu Daga Hannun ’Yan Ta’adda A Zamfara

Sojojin Sector 2 na Operation FANSAN YAMMA sun ceto wasu mutane biyu da ake zargin ’yan ta’adda dauke da makamai sun yi yunkurin yin garkuwa da su a Jihar Zamfara.

An ceto mutanen ne a ranar 4 ga Oktoba yayin da sojojin ke sintiri a hanyar Anka zuwa Gadan Manya, cikin karamar hukumar Anka.

Wata majiya daga bangaren tsaro ta ce sojojin sun hangi ’yan ta’addan suna kokarin kai wa wasu mutane biyu da ke kan babur hari.

Majiyar ta ce sojojin sun shiga lamarin cikin gaggawa, lamarin da ya tilasta wa ’yan ta’addan tserewa tare da barin mutanen da suka kai wa harin.

Daga nan sojojin suka ceto mutanen biyu tare da kai su wani wuri mai tsaro.

Bayan faruwar lamarin, jami’an tsaro sun kara yawan sintiri a hanyar Anka-Gadan Manya domin hana ’yan ta’adda gudanar da ayyukansu tare da kare rayukan mazauna yankin da masu amfani da hanyar.