2027: ADC Ba Za Ta Yarda Da Magudin Zabe Ba — David Mark

Shugaban jam’iyyar African Democratic Congress (ADC), David Mark, ya ce jam’iyyar ba za ta amince da duk wani yunkurin magudin zabe ko hana ta shiga takarar zaben 2027 ba.

David Mark ya bayyana hakan ne a Abuja ranar Laraba yayin da ya karbi bakuncin majalisar gudanarwar Savannah Centre for Diplomacy, Democracy and Development, karkashin jagorancin tsohon Alkalin Alkalai na Najeriya, Olukayode Ariwoola.

Ya ce ADC za ta bi dokokin zabe da ka’idojin da hukumar INEC ta gindaya, tare da bin ka’idar gudanar da harkokin siyasar jam’iyyar, amma ba za ta amince da duk wani yunkurin karkatar da zabe ba.

Mark ya ce jam’iyyar na kokarin gudanar da siyasa ta hanyar da za ta kara wa jama’a kwarin gwiwa kan dimokuradiyya.

A nasa bangaren, Ariwoola ya ce Savannah Centre na neman alkawarin jam’iyyun siyasa da ’yan takararsu na gudanar da zabe cikin lumana, gaskiya da adalci.

Ya kuma bukaci shugabannin ADC da su tabbatar da cewa ’yan takararsu da magoya bayansu sun bi ka’idojin INEC, tare da kauce wa duk wani hali da zai iya haifar da rikicin siyasa ko tashin hankali.

Taron na daga cikin jerin shawarwari da Savannah Centre ke yi da jam’iyyun siyasa da sauran masu ruwa da tsaki gabanin babban zaben 2027.