Yari ya bayyana jihar da Tinubu zai kaddamar da yaƙin neman zaɓensa

Darakta Janar na Kwamitin Yaƙin Neman Zaɓen Shugaban Ƙasa na jam’iyyar APC, Sanata Abdulaziz Yari, ya bayyana cewa Shugaba Bola Ahmed Tinubu zai fara gangamin neman tazarcensa daga  jihar Kaduna ranar 24 ga Oktoba. Yari ya  faɗi hakan ne bayan wata ganawa da ya yi da da shugaban ƙasa a fadar Aso Rock da ke Abuja.

Yari ya ce ya miƙa wa Shugaba Tinubu jadawalin tarurruka da ziyarce-ziyarcen jihohi domin yaƙin neman zaɓe, kuma shugaban ya amince da shirin. A cewarsa, za a yi taron ƙaddamar da kwamitin yaƙin neman zaɓen ranar 14 ga wannan wata a Abuja, sannan a fara gangamin yaƙin neman zaɓe a Kaduna ranar 24 ga Oktoba.

Ya ƙara da cewa bayan kaddamar da yaƙin neman zaɓe a Kaduna, tawagar shugaban za ta nufi Port Harcourt sannan Maiduguri, tare da ci gaba da rangadin sauran jihohin ƙasar. Ya ce za a fitar da cikakken jadawalin bayan an kammala ƙaddamar da kwamitin.

Sanata Yari  ya kuma soki abokan hamayyar Tinubu, wato Atiku Abubakar na ADC da Peter Obi, yana mai cewa ba su da isasshen goyon baya a  jihohi da zai ba su damar kayar da Tinubu a zaɓen 2027. A cewarsa, Atiku ba shi da wata jiha da yake da cikakken tasiri a Kudu, yayin da Obi kuma ba shi da irin wannan tasiri a Arewa.

A ƙarshe, Yari ya bayyana cewa Tinubu yana da tasiri a fiye da jihohi goma a Arewa da kuma fiye da goma a Kudu. Inda ya kara da  cewa gwamnatin Tinubu ta kawo sauye-sauye a tattalin arzikin ƙasa tun bayan hawansa mulki, kuma APC za ta yi yaƙin neman zaɓe ne bisa ayyukan da gwamnatin ta aiwatar maimakon yin alkawuran da ba a fara cika su ba.