Ƴan fashin dajin a ranar Lahadi sun kai da farmaki kan wani shingen binciken ƴan sanda inda suka kashe ɗan sanda guda ɗaya tare da jikkata Wasu.
Shingen binciken an kafa shi ne tazarar ƙasa da kilomita ɗaya kafin ka isa Kwatarkwashi garin dake kusa da Gusau babban birnin jihar.
Majiyoyi da dama sun faɗawa jaridar Daily Trust cewa ƴan fashin dake kan babura sama da 40 sun kai farmakin ne da misalin ƙarfe 04:00 na asubahin ranar Lahadi.
Ƴan fashin sun ƙona duk wani mai muhimmanci da suka samu a shingen binciken kafin su bar wurin.
A cewar wata majiya ƴan fashin dajin sun samu nasarar fin ƙarfin ƴan sandan abun da yasa wasu daga cikinsu suka tsere bayan an ɗauki lokaci suna musayar wuta.
