Sojoji sun kashe ƴan ta’adda biyu tare da gano makamai a jihar Borno

Dakarun rundunar sojan Najeriya sun kashe wasu ƴan ta’adda biyu a ƙauyen Kana dake ƙaramar hukumar Biu ta jihar Borno.

A wata sanarwa ranar Asabar rundunar sojan ta ce an kashe ƴan ta’addar ne a ranar 19 ga watan Afrilu.

Rundunar sojan ta ce dakarunta sun yi arangama da ƴan ta’addar a wajejen ƙauyen Nguma ta kara da cewa an gano babur ɗaya da kekuna 6 sai bindiga ƙirar AK-47 da kuma sauran kayayyaki da aka yi watsi da su.

A kuma wani samamen na daban dakarun sojan na Najeriya sun kai samame a ƙauyen Abuni dake ƙaramar hukumar Awe ta jihar Nasarawa kan wasu maɓoyar bata gari inda aka gano bindigogi.

An samu nasarar gano bindigogi biyu ƙirar AK-47 a gidan wani da ake kira Abdullahi Musa tare da kama ƙarin wasu mutane.