Aƙalla mutane hudu ne aka tabbatar da mutuwarsu bayan ruftawar wani ramin hakar ma’adinai a karamar hukumar Ningi da ke jihar Bauchi.
Lamarin ya faru ne a Yadagungume da ke gundumar Burra ranar Asabar.
Kakakin Rundunar ’Yan sandan Jihar Bauchi, SP Ahmed Wakil, ne ya bayyana haka a wata tattaunawa ta wayar tarho, inda ya ce rundunar ta samu kiran gaggawa a ranar da wani ya kai rahoton faruwar lamarin.
Ya ce da samun rahoton, jami’in ‘yan sanda reshen Ningi ya tara mutanensa zuwa inda ake hakar ma’adinan, inda aka kwashe gawarwakin wadanda suka mutu aka kai su asibiti.
