Hukumar Kiyaye Haɗurra ta Ƙasa (FRSC) ta tabbatar da mutuwar mutum bakwai, yayin da mutum biyar suka jikkata a wani mummunan hatsarin mota da ya faru a hanyar Bauchi zuwa Maiduguri.
Hatsarin ya auku ne a ƙauyen Kajutu a Jihar Bauchi, inda motar bas mai ɗaukar fasinjoji ta yi karo da wata babbar mota ƙirar tipa.
FRSC ta ce mutum 12 ne hatsarin ya rutsa da su, kuma binciken farko ya nuna cewa karya dokokin hanya da tuki cikin ganganci a wani ɓangaren hanya da ya lalace ne suka haddasa hatsarin.
An garzaya da waɗanda suka jikkata da gawarwakin mamatan zuwa Asibitin Koyarwa na Jami’ar Abubakar Tafawa Balewa (ATBUTH) da ke Bauchi. Hukumar ta kuma buƙaci masu amfani da hanya su riƙa bin dokokin tuki domin kauce wa irin waɗannan haɗurra.
Mutum Bakwai Sun Mutu, Biyar Sun Jikkata A Hatsarin Mota A Bauchi
