Rundunar ‘Yan Sandan jihar Bauchi ta kama mutum 2 tare da ƙwato motar Toyota Hilux ta 2022 da aka sace daga Bukuru, jihar Filato.
Rundunar ta ce jami’anta sun cafke waɗanda ake zargin ne a wani otel da ke Bauchi bayan samun bayanan sirri daga jihar Filato.
Babban wanda ake zargin, Ibrahim Tijjani, mai shekaru 31, tsohon Laftanar Sojan Najeriya ne da aka sallama daga aiki a 2021. ‘Yan sanda sun ce ya amsa laifin satar motar, tare da bayyana cewa ya taɓa satar wasu motoci 2 daga jihar Bauchi kafin ya sayar da su a wata jiha.
Rundunar ta mayar da motar ga mai ita, yayin da ta ce bincike na ci gaba kafin gurfanar da waɗanda ake zargin a kotu.
Kwamishinan ‘Yan Sandan jihar, Sani-Omolori Aliyu, ya yaba wa jami’an binciken manyan laifuka bisa nasarar da suka samu, tare da buƙatar al’umma su ci gaba da bai wa jami’an tsaro sahihan bayanai kan ayyukan masu laifi.
‘Yan Sandan Bauchi Sun Ƙwato Motar Hilux Da Aka Sace, Sun Kama Mutum 2
