Hukumar zabe mai zaman kanta ta kasa INEC ta sanar da ranakun da za a gudanar zabukan 2023.
Tun da farko dai hukumar ta sanar da cewa za a gudanar da zaben shugaban kasa ranar 23 ga watan Faburairu sai dai shugaban hukumar ta INEC, Mahmoud Yakubu ya fadawa yan jaridu cewa an sake saka sabbin ranakun zabe.
A cewarsa yanzu za a gudanar da zaben shugaban kasa da na yan majalisun tarayya ranar 25 ga watan Faburairu yayin da za a gudanar da zaben gwamnoni da na yan majalisun jiha ranar 11 ga watan Maris.
Sanar da ranakun zaben na zuwa ne kwana biyu bayan da shugaban kasa, Muhammad Buhari ya rattaba hannu kan sabuwar dokar zabe.
