Insifectan yan sanda da aka bayyana da Sylve da kanin tsohon shugaban karamar hukumar Kuje,Alhaji Muhammad A. Galadima da kuma Nengbe Mundi sun samu yancin kansu ne bayan da suka biya kudin fansa miliyan ₦2 ga mutanen da suka yi garkuwa da su.
Mutanen uku an yi garkuwa da su a ranakun Juma’a da kuma Asabar din da suka wuce, a garin Rubochi dake karamar hukumar .
Wani daga cikin iyalinsu da ya nemi a boye sunansa, ya tabbatar da sakin jami’in dan sandan da kuma sauran mutane biyun da aka yi garkuwa da su.
Ya ce an sako mutanen ne da misalin karfe 11 na dare bayan da masu garkuwar suka karbi naira miliyan daya kudin fansar kanin shugaban karamar hukumar,₦550,000 na jami’in dan sandan da kuma ₦400,000 na Nengba Mundi.
A cewarsa an kai kudin fansar ne wani daji dake kusa da kauyen Ggowodi a karamar hukumar Toto ta jihar Nasarawa.
Ya kuma ce an saya musu katin waya na Glo har na ₦30,000, sinkin kwalin taba Aspen da kuma katan guda na maganin Boska.