Wasu mutane sun yi bore tare da rufe hanyar Kontagora zuwa Jega kan matsalar tsaro

Wasu mazauna jihar Kebbi sun toshe babbar hanyar Jega zuwa Kontagora a ranar Asabar domin nuna rashin jin daɗinsu da hare-haren da ake ci gaba da kai wa al’ummominsu, waɗanda suka zargi ‘yan ta’addan Lakurawa da aikatawa.

Wani bidiyo da ke yawo a kafafen sada zumunta ya nuna masu zanga-zangar suna kunna wuta a kan hanyar, duk da ƙoƙarin jami’an ‘yan sanda na tarwatsa su ta hanyar amfani da hayaki mai sa hawaye.

Rahotanni sun nuna cewa zanga-zangar ta sa direbobi da matafiya makale na sa’o’i da dama kafin daga bisani aka sake buɗe hanyar domin ci gaba da zirga-zirga.

Wani mazaunin Jega, Nazeer Muhammad, ya shaida wa wakilinmu cewa ƙauyuka da dama da ke kewaye da yankin sun zama kufai sakamakon hare-haren da ƙungiyar masu ɗauke da makamai ke kaiwa akai-akai, lamarin da ya tilasta wa mazauna tserewa zuwa wuraren da suka fi aminci.

Ya ce, “A halin yanzu garinmu ya cika da mutanen da suka rasa matsugunansu, wasu daga cikinsu ma suna kwana a fili ba tare da mafaka ba.”

A cewarsa, wasu daga cikin waɗanda suka tsere sun fito ne daga al’ummomin Mayama da Ungushi da ke jihar Sokoto.

Wani mazaunin Jega, wanda ya bayyana sunansa da Malam Idris  ya ce kimanin manyan motoci takwas ɗauke da mutanen da suka rasa matsugunansu ne suka iso garin a ranar Lahadi.

Ya ce, “Wasu daga cikinsu suna zaune a makarantu, yayin da wasu ba su da inda za su zauna. A halin yanzu suna rayuwa ne da taimakon masu hannu da shuni da sauran masu taimakon al’umma.”