NDLEA Ta Sake Kama Tsohuwa Mai Shekaru 83, Ta Kwace Miyagun Ƙwayoyi A Jihohi Da Dama

Hukumar Hana Sha da Fataucin Miyagun Ƙwayoyi ta Najeriya (NDLEA) ta sake kama wata tsohuwa mai shekaru 83, mai suna Uloma Sunday, bisa zargin mallakar methamphetamine da Colorado a Jihar Abia, watanni 17 bayan kama ta a karon farko.

Daraktan Yaɗa Labarai da Wayar da Kan Jama’a na hukumar, Femi Babafemi, ne ya bayyana hakan a wata sanarwa da ya fitar ranar Lahadi. Ya ce jami’an hukumar sun kama tsohuwar a gidanta da ke Ite-Uzo, Umuaguma, Ƙaramar Hukumar Obingwa, ranar 7 ga Oktoba. Ana zargin an ɓoye ƙwayoyin a jikinta, a kusa da ƙugunta, ƙarƙashin zani.

A cewar Babafemi, bayanan sirri sun nuna cewa tsohuwar tana gudanar da wurin sayar da miyagun ƙwayoyi da masu aikata laifuffukan da ke addabar al’ummar yankin ke taruwa.

NDLEA ta fara kama Sunday da ’yarta mai shekaru 32, Chisom Uchechi, a wannan gida ranar 17 ga Mayun 2025. A lokacin, jami’an sun kwato gram 50 na methamphetamine, gram 522 na skunk, gram 260 na ganyen wiwi sabo da gram 12 na tramadol.

Sanarwar ta ce matan biyu sun amsa laifin da ake tuhumarsu da shi, kuma kotu ta yanke wa kowannensu hukuncin ɗaurin watanni 12 ko biyan tarar Naira 200,000. Sun biya tarar aka sake su.