An kashe mayakan ISWAP 40 da kuma  babban kwamandansu a Borno

Wani harin sama na musamman da ɗakarun Rundunar Sojin Sama dake aiki tare da rundunar haɗin gwiwa ta  Operation HADIN KAI  su kai ya kai ga  kashe   mayaƙan    kungiyar ƴan ta’addan  ISWAP 40, ciki har da wani babban kwamandansu. An kai harin ne a ranar 10 ga watan Oktoba, 2026, kan wani sansanin ISWAP da ke ƙauyen Badu, a kudancin Gudumbali cikin ƙaramar hukumar Guzamala ta jihar Borno.

A cikin wata sanarwa da kakakin rundunar, Kyaftin Mohammed Goni, ya fitar, ya bayyana cewa an kai harin ne bayan samun ingantattun bayanan leƙen asiri. Rahotanni sun nuna cewa mayaƙan ISWAP da dama sun taru a wurin domin shiryawa da ƙaddamar da hare-hare a kan sojojin da ke aiki a shirya ta  3 na rundunar.

Da samun bayanan, rundunar sojin saman ta gaggauta tura jiragen leƙen asiri domin sa ido kan yankin. Bayan tabbatar da wuraren da ake zargin sansanonin ‘yan ta’addan da cibiyoyin ajiyar kayan aikinsu ne, aka ƙaddamar da harin sama kai tsaye kan babban ginin da mayaƙan ke amfani da shi.

Mahukuntan soji sun bayyana cewa mayaƙan da aka kai wa harin sun kasance daga rukunin “Murabitun”na ISWAP, wata ƙungiya ta mayaƙa masu saurin motsi da ke da alhakin gudanar da sintiri, jagorantar hare-hare, da kuma ci gaba da ayyukan ta’addanci a yankin. Baya ga asarar rayuka, harin ya yi wa hanyoyin tallafin kungiyar babbar illa, inda aka lalata motocin aiki guda biyu da kuma kusan babura 20 da ake amfani da su wajen sufuri, kai kayan aiki, da kai hare-hare.

Rundunar ta ce lalata waɗannan kayayyaki ya rage ƙarfin ISWAP sosai tare da dakile hare-haren da suke shirin kai wa sansanonin sojoji da al’ummomin fararen hula da ke yankin Tafkin Chadi. Rundunar Operation HADIN KAI ta jaddada cewa za ta ci gaba da matsa lamba kan sauran maɓoyar ‘yan ta’adda ta hanyar haɗa hare-haren sama da na ƙasa, domin kawar da barazanar ta’addanci, kare rayuka da dukiyoyi, da kuma tabbatar da zaman lafiya mai ɗorewa a jihar Borno da sauran yankunan Arewa maso gabas.