Wasu mutane sun kashe wani ɗan sanda da adda a jihar Filato

Wasu mutane sun kashe Abdulrahman Auwal, jami’in rundunar ‘yan sandan kwantar tarzoma (MOPOL), a wani hari da aka kai masa da adda a kan titin Kwi da ke ƙaramar hukumar Barkin Ladi a jihar Plateau.

A cewar Zagazola Makama, wata kafar yaɗa labarai da ke mayar da hankali kan harkokin yaƙi da masu tayar da ƙayar baya a yankin Tafkin Chadi, lamarin ya faru ne da misalin ƙarfe 6:51 na yammacin ranar Alhamis lokacin da dakarun Operation Enduring Peace (OPEP) suka mayar da martani bayan samun rahoton kai hari kan jami’in.

Makama ya ce dakarun da suka isa wurin sun tarar da mamacin dauke da raunuka da dama sakamakon sara da adda, yayin da waɗanda ake zargi da kai harin suka tsere daga wurin.

Kafar ta rawaito cewa, duk da cewa abokan aikinsa sun garzaya da shi asibiti domin ceto rayuwarsa, likitoci sun tabbatar da mutuwarsa jim kaɗan bayan isa asibitin.

Rahoton ya ƙara da cewa jami’an tsaro sun fara gudanar da bincike domin gano yadda lamarin ya faru da kuma tantance mutanen da suka aikata laifin domin kamo su tare da gurfanar da su a gaban shari’a.