Yan bindiga sun kashe masu hakar ma’adanai 5 a Filato

Aƙalla masu haƙar ma’adinai biyar aka kashe, wasu biyu kuma suka jikkata bayan ‘yan bindiga sun kai hari a wurin hakar ma’adinai da ke kauyen Marit a ƙaramar hukumar Barkin Ladi, Jihar Filato, a ranar Asabar.

Harin ya faru ne a yayin da ake ci gaba da shiga cikin tashin hankali a wasu sassan jihar. 

Mai magana da yawun ƙungiyar matasan ta  Berom Youth Moulders-Association (BYM), Rwang Tengwong, shi ne  ya tabbatar da faruwar lamarin, inda ya ce ya faru da misalin ƙarfe 1 na rana. 

“Mutane biyar aka kashe yayin wasu biyu kuma suka jikkata a harin. Wannan lamari ne mai matuƙar baƙin ciki da raɗaɗi. Mutanenmu sun sake shiga cikin jimami saboda rasa rayuka sakamakon tashin hankali.”  a cewar Tengwong

Ya ƙara da cewa: “Munyi allawadai da wannan harin kuma muna kira ga jami’an tsaro da su ɗauki matakan gaggawa don kare al’ummominmu da kuma hana sake faruwar irin wannan hari.” 

Wani ɗan ƙauyen, Simon Mundat, ya kuma tabbatar da lamarin, inda ya ce asarar rayuka abin takaici ne ƙwarai. 

Mundat ya ce: “Muna cikin baƙin ciki sosai saboda wannan hari. Mutane biyar aka kashe, wasu biyu kuma sun jikkata. Wannan lamari ne mai matuƙar raɗaɗi ga al’umma. Muna roƙon hukumomi da su ƙarfafa tsaro a yankin domin mutanenmu su ci gaba da gudanar da ayyukansu ba tare da tsoro ba.” 

Sai dai masu magana da yawun Operation Enduring Peace da Rundunar ‘Yan Sanda ta Jihar, Captain Polycarp Oteh da SP Alabo Alfred, ba su ce uffan ba kan faruwar harin. bayan da wakilin jaridar Daily Trus ya tuntube su.

A ranar Litinin ne gwamnatin jihar Filato ta kafa dokar hana fita daga yamma zuwa safe a kananan hukumomi uku, ciki har da Barkin Ladi, domin dawo da zaman lafiya bayan hare-hare da kashe-kashen dake faruwa.