

‘Yan bindiga sun kashe Babban Mataimaki na Musamman (SSA) ga Gwamnan Jihar Zamfara, Dauda Lawal, a garin Kaura Namoda da ke Jihar Zamfara.
An ruwaito cewa an harbe mai taimakawa gwamnan, Alhaji Nasiru Sani Kaura, har lahira lokacin da ‘yan bindigar suka kai hari a unguwar Low Cost da ke Kaura Namoda da safiyar Lahadi.
Mazauna yankin sun ce maharan sun mamaye unguwar ne yayin da Musulmi ke gudanar da sallar Asuba (Fajr), inda suka riƙa harbe-harbe ba ƙaƙƙautawa, lamarin da ya tilasta wa mutane guduwa domin tsira da rayukansu.
An ce Nasiru, wanda fitaccen ɗan siyasa ne na karkara kuma jagoran al’umma, ya rasa ransa a yayin harin.
Mutuwarsa ta jefa al’ummar Kaura Namoda da sauran sassan jihar cikin jimami, inda masu ta’aziyya suka bayyana kisan nasa a matsayin babban rashi ga al’umma.
Daga bisani an gudanar da sallar jana’izarsa bisa ga koyarwar addinin Musulunci.
Wannan kisa ya sake tayar da hankalin jama’a game da matsalar tsaro a Kaura Namoda da sauran yankunan Zamfara ta Arewa, inda al’umma ke ci gaba da fuskantar hare-haren ‘yan bindiga, kashe-kashe da kuma garkuwa da mutane.
Mazauna yankin sun yi kira ga gwamnatin jihar da jami’an tsaro da su ƙara ƙaimi wajen kare rayuka da dukiyoyin jama’a, musamman a unguwannin da al’umma ke da zama.
A wani lamari na daban kuma, Rundunar ’Yan Sandan Jihar Zamfara ta bayyana cewa ta ceto mutane 19 da aka yi garkuwa da su, waɗanda suka haɗa da mata da yara, bayan sun shafe kwanaki 22 a hannun ‘yan bindiga.
An sace waɗannan mutanen ne daga ƙauyen Tungar Haki ta hanyar Wanke a Ƙaramar Hukumar Gusau, sannan aka kai su maboyar ‘yan bindiga da ke yankin ƙauyen Kungurmi.