Garkuwa da mutane 20:IGP ya tura manyan jami’an ƴan sanda zuwa jihar Imo

Tunji Disu, babban sufeton ‘yan sandan Najeriya ya tura Shehu Nadada, mataimakin babban sufeton ‘yan sanda (DIG) mai kula da ayyuka, domin jagorantar aikin ceto fasinjoji 20 da aka yi garkuwa da su a Imo. 

A ranar 1 ga Oktoba, aka tare motocin bas biyu da ke ɗauke da ‘yan NYSC da sauran fasinjoji a Umunoha, kan hanyar Owerri-Onitsha. 

Rundunar ‘yan sandan jihar Imo ta ce ta gano motocin biyu tare da ceto mutane 10 a wurin da lamarin ya faru. 

A cikin wata sanarwa da aka fitar a ranar Juma’a, mai magana da yawun rundunar, Anietie Iniedu, ta bayyana cewa Nadada ya isa jihar tare da kwamishinonin ‘yan sanda biyu, inda suka gudanar da bincike kai tsaye kan aikin. 

ta ce DIG ɗin ya sake duba yadda aka tura jami’ai da kayan aiki, sannan ya bayar da umarni don ƙarfafa haɗin gwiwar martani. 

Iniedu ta ce wannan binciken duba wurin da abun ya faru ya gudana tare da Audu Bosso, kwamishinan ‘yan sanda na Imo da kuma Akpan Anifiok, kwamishinan ‘yan sanda mai kula da ayyukan yau da kullum, da sauran shugabannin tsaro. 


“‘Yan sanda na aiki tare da sauran hukumomin tsaro domin tabbatar da an ceto mutanen da aka yi garkuwa da su lafiya kuma tare da  kama waɗanda suka aikata laifin.”  a cewar sanarwar

Rundunar ta tabbatar wa jama’a cewa za ta ci gaba da aikin har sai an ceto fasinjoji 20 da aka yi garkuwa da su.