Sojoji sun daƙile yinƙurin ƴan ta’adda na ɗana bom akan titin Maiduguri – Damboa

Sojoji sun daƙile yunƙurin ‘yan ta’addar  Boko Haram da ke ƙoƙarin dasa bama-bamai  a kan hanyar Maiduguri-Damboa a jihar Borno. 

A cewar Zagazola Makama, kafar yaɗa  labarai dake wallafa bayanai kan sha’anin tsaro a yankin tafkin Chadi kula , hakan ya jawo musayar harbi da kuma harba rokoki a kusa da kauyen Dalwa da yammacin ranar Juma’a. 

Majiyoyi sun shaida wa jaridar cewa an ji karar harbe-harbe da fashewa daga misalin ƙarfe 8 na dare, musamman a cikin al’umman da ke kan hanyar kudu daga Maiduguri zuwa Damboa. 

“Lamarin ya faru ne awanni bayan wani hari daban a ƙaramar hukumar Marte, inda aka ce akalla manoma 15 aka kashe,” a cewar rahoton. 

Wani memba na Civilian Joint Task Force (CJTF), wanda ya nemi a ɓoye sunansa, ya ce sojoji sun yi aiki bisa bayanan sirri da suka nuna cewa ‘yan ta’addan na ƙoƙarin dasa bama-bamai a kan hanyar. 

A cewar majiyar, an gano su yayin da suke ƙoƙarin dasa abubuwan fashewa, lamarin da ya sa sojoji suka fara harba rokoki domin tarwatsa su. Sai dai ‘yan ta’addan sun mayar da martani da harbi kafin daga bisani aka tarwatsa su. 

Rahoton ya ce an dawo da zaman lafiya a yankin, yayin da sojoji ke ci gaba da bin sawun ‘yan ta’addan da suka gudu. 

Hanyar Maiduguri-Damboa na da muhimmanci wajen haɗa Maiduguri da al’umman kudancin Borno, wanda ya sa yunƙurin dasa bama-bamai a kan hanya ya zama babban barazana ga masu zirga-zirga da mazauna yankin.