Ƴan Ta’adda Sun HaIIaka Manoma 15, Sun Sace Uku A Borno

Wasu da ake zargin mayakan Boko Haram ne sun yi wa manoma kwanton bauna tare da kashe 15 daga cikinsu, yayin da suka sace wasu uku a karamar hukumar Marte ta Jihar Borno.

Lamarin ya faru ne a ranar Laraba a yankunan Ala, Gumna da Musune, kusa da hedikwatar karamar hukumar. Majiyoyin yankin sun ce manoman sun je gonakinsu ne domin girbe amfanin gona lokacin da ’yan ta’addan suka kai musu hari.

Wata majiya ta ce an fara gano gawarwaki biyar a gonakin, kafin daga bisani aka gano wasu. An ce har yanzu ba a san inda mutane uku suke ba, yayin da ake zargin ’yan ta’addan sun yi garkuwa da su.

Jami’in hulda da jama’a na rundunar ’yan sandan Borno, DSP Kenneth Nahum Daso, ya tabbatar da mutuwar mutane 15, yana mai cewa hukumomi na ci gaba da kokarin gano inda mutanen uku da suka bace suke.

Wata ’yar uwar wani daga cikin wadanda aka kashe ta ce an tilasta wa manoman kwanciya a kasa kafin a harbe su a kai daga kusa.

Kungiyar Amnesty International ta yi Allah-wadai da kisan, tana mai bayyana shi a matsayin mummunan take hakkin dokokin jin kai na kasa da kasa. Kungiyar ta bukaci hukumomin Najeriya su dauki matakan gaggawa domin kare al’ummomin da ke cikin hadari a yankin Arewa maso Gabas.