Jami’o’in Birtaniya Sun Janye Guraben Karatun Da Aka Ba Wa Wasu ’Yan Najeriya

Wasu jami’o’in Birtaniya sun fara janye guraben karatu da suka bai wa ɗaliban ƙasashen waje, musamman ’yan Najeriya da ’yan Pakistan, sakamakon tsaurara matakan bayar da bizar karatu da gwamnatin ƙasar ke yi.

Wani rahoton Financial Times da jaridar PUNCH ta wallafa ranar Lahadi ya bayyana cewa jami’o’in sun ɗauki matakin ne a farkon rabin shekarar 2026, saboda ƙaruwa da aka samu a yawan ƙin amincewa da buƙatun bizar karatu.

Bayanai sun nuna cewa kashi 10.5 cikin 100 na buƙatun bizar karatu zuwa Birtaniya sun ƙare da janye su a farkon rabin shekarar 2026, idan aka kwatanta da kashi 2.3 a daidai wannan lokacin na 2025 da kashi 0.4 a 2023.

Ga ’yan Najeriya kuwa, kashi 22.7 cikin 100 na buƙatun bizar karatu ne aka janye a farkon rabin shekarar 2026, idan aka kwatanta da kashi 4.5 a farkon rabin shekarar 2025.

Rahoton ya ce jami’o’in sun bayyana cewa ƙarin tsaurara binciken biza da Hukumar Kula da Shige da Fice ta Birtaniya (Home Office) ke yi ne ya sa suka fara janye guraben karatu, saboda fargabar cewa za a iya hana su ɗaukar ɗaliban ƙasashen waje idan yawan ƙin amincewa da biza ya zarce ƙa’idar da aka gindaya.