’Yan Sanda Sun Mayar Wa Masu Su Motoci Da Babur Da Aka Sace A Kano

Rundunar ’Yan Sandan Jihar Kano ta mayar wa masu su wata mota mai launin ruwan lemu kirar Vibe da babur mai launin toka kirar Haojue, bayan ta gano tare da tabbatar da mallakarsu.

Jami’in hulɗa da jama’a na rundunar, CSP Abdullahi Haruna Kiyawa, ne ya bayyana hakan a cikin wata sanarwa da ya fitar ranar Juma’a.

Sanarwar ta ce an gano motocin ne ta hanyar ayyukan bincike da suka dogara da bayanan sirri, sannan aka miƙa su ga masu su a hedikwatar rundunar da ke Bompai, Kano, bayan tantance takardun mallaka.

Masu motocin sun gode wa rundunar bisa ƙoƙarin da ta yi na dawo musu da dukiyoyinsu.

Kwamishinan ’Yan Sandan jihar, Ibrahim Adamu Bakori, ya taya su murna, tare da bayyana cewa matakin ya dace da manufar Sufeto-Janar na ’Yan Sanda, Olatunji Disu, ta kare rayuka da dukiyoyin jama’a da kuma ƙarfafa amincewar al’umma ga jami’an tsaro.

Ya kuma tabbatar da cewa rundunar za ta ci gaba da mayar da dukiyoyin da aka gano an sace ga masu su na gaskiya bayan tantancewa.

Rundunar ta buƙaci mutanen da ke neman bayanai kan dukiyoyin da aka gano su tuntuɓi jami’in binciken da ke kula da shari’ar ta lambar waya 08140081608, ko su ziyarci ofishin hulɗa da jama’a da ke hedikwatar ’yan sanda ta Bompai, Kano.