Ana Fargabar Mutane Da Yawa Sun Mutu A Hadarin Mota A Plateau

Ana fargabar mutane da dama sun mutu a wani mummunan hadarin mota da ya afku a kauyen Tom, wanda aka fi sani da Hawan Kibo, a Sopp Bachi, karamar hukumar Riyom ta Jihar Plateau.

Rahotannin farko sun ce hadarin ya faru ne a yammacin ranar Juma’a, inda mutane da dama suka rasa rayukansu.

Wani masani kan harkokin tsaro, Zagazola Makama, ya bayyana a wani sakon da ya wallafa a shafinsa na X cewa har zuwa lokacin hada rahoton, ba a tabbatar da ainihin adadin mutanen da suka mutu ko cikakken bayani kan yadda hadarin ya faru ba.

Ya ce ana bukatar jami’an agaji da sauran hukumomin da abin ya shafa su gaggauta isa wurin domin taimaka wa wadanda lamarin ya rutsa da su tare da kai wadanda suka jikkata zuwa asibiti.

Makama ya kara da cewa ana jiran karin bayani daga wurin da hadarin ya faru.