Tsohon Gwamnan Jihar Adamawa, Sanata Mohammed Umar Jibrilla Bindow, ya yi murabus daga jam’iyyar African Democratic Congress (ADC).
Bindow, wanda ya jagoranci jihar daga 2015 zuwa 2019, ya bayyana hakan ne a cikin wata wasiƙa da ya aike wa shugaban jam’iyyar na mazaɓarsa ta Lokuwa da ke ƙaramar hukumar Mubi ta Arewa.
Ya ce ya ɗauki wannan mataki ne bayan nazari mai zurfi kan akidunsa, manufofinsa na siyasa da kuma burinsa na ci gaba da yi wa al’umma hidima.
Bindow ya gode wa shugabanni da mambobin ADC bisa damar da suka ba shi na ba da gudunmawa ga ci gaban jam’iyyar, yana mai cewa lokaci ya yi da zai bi wata sabuwar hanya da ta dace da hangen nesansa na siyasa.
Tsohon Gwamnan Adamawa Bindow Ya Fice Daga ADC
