Wasu manyan jiragen dakon mai guda biyu na ƙasar China da ke ɗauke da ganga miliyan huɗu na ɗanyen mai sun ratsa mashigar Hormuz bayan sun shafe fiye da wata biyu suna jiran samun damar wucewa a yankin Tekun Fasha.
Bayanan kamfanonin Kepler da LSGA sun nuna cewa jiragen sun ɗauki ɗanyen man Gabas ta Tsakiya kafin su tsallaka wannan muhimmiyar hanyar ruwa a ranar Laraba.
Rahotanni sun ce a kwanakin baya jiragen ruwa kaɗan ne kawai suka rika amfani da mashigar Hormuz, sakamakon tashin hankali a yankin.
Sai dai nasarar da jiragen suka samu wajen wucewa tare da kalaman da Fadar White House ta yi kan yiwuwar zaman lafiya da Iran sun taimaka wajen rage farashin mai kaɗan.
A ranar Talata, shugaban Amurka Donald Trump ya bayyana cewa ana dab da cimma yarjejeniyar zaman lafiya da Iran, amma ya jaddada cewa duk wata yarjejeniya dole ne ta hana Iran mallakar makamin nukiliya.
Manyan Jiragen Dakon Mai Na China Sun Ratsa Mashigar Hormuz
