Shugaban Amurka, Donald Trump, ya yi gargadin cewa Iran za ta fuskanci mummunan hari idan ta ci gaba da rufe mashigin ruwan Strait of Hormuz, wanda ke da muhimmanci wajen jigilar danyen mai a duniya.
Trump ya bayyana haka ne a wata hira da tashar Fox News, inda ya ce ana samun ci gaba a tattaunawar da ake yi da Iran. Duk da haka, ya ce idan Tehran ta janye daga alkawurran da ta dauka, Amurka za ta sake amfani da hare-haren makamai masu linzami.
Sai dai gwamnatin Iran ta musanta cewa tana tattaunawa kai tsaye da Amurka. Ta ce tana aiki tare da kasar Oman domin cimma yarjejeniyar sake bude mashigin.
Hukumomin Iran sun kuma bayyana cewa ko da an cimma yarjejeniya, mashigin Strait of Hormuz ba zai koma yadda yake kafin barkewar rikicin baya ba, tare da jaddada cewa za su ci gaba da kare muradun kasarsu.
Trump Ya Yi Barazanar Daukar Matakin Soja Kan Iran Idan Ba A Bude Mashigar Hormuz Ba
