Medhi Benatia ya sanar da yin ritaya daga buga wa tawagar kwallon kafar Morocco tamaula.
Benatia mai shekara 32, mai tsaron baya ya buga wa Morocco wasa 62 ya kuma ci kwallo biyu kacal.
A lokacin da yake sanar da yin riyar, ya gode wa dukkan wadanda suka bashi gudunmawa da dukkan ‘yan kasar.
Kyaftin din tawagar Morocco ya koma taka-leda a Al Duhail ta Qatar a watan Janairu, bayan sama da shekara biyu da ya yi a Juventus.
Hakan ya bi sawun Mbarek Boussoufa da Karim Al Ahmadi wadanda suka yi ritaya daga buga wa Morocco tamaula a bana, bayan da kasar ta kasa taka rawar gani a kofin nahiyar Afirka da aka yi a Masar.
Benatia ya halarci wasan cin kofin nahiyar Afirka har sau hudu ya kuma je gasar cin kofin duniya da aka yi a Rasha a 2018.
Tuni ya sanar da kocin Morocco, Vahid Halilodzic da kar ya saka shi cikin ‘yan wasan da kasar za ta kara da Libya da kuma Gabon a cikin watan nan.