Mutane 14 Sun Mutu a Hatsarin Mota da Ya Rutsa da Motar Dakon Fasinjoji da Shanu a Neja



Akalla mutane 14 ne suka mutu a wani mummunan hatsarin mota da ya rutsa da wata babbar mota dauke da fasinjoji da shanu 35 a kan hanyar Kontagora da ke Jihar Neja.

Hatsarin ya faru ne da misalin karfe 11 na safiyar ranar 17 ga Nuwamba, 2026, a kusa da garin Ibeto, lokacin da motar mai lambar rajista Lagos AZL 267 XH ke kan hanyarta daga karamar hukumar Koko ta Jihar Kebbi zuwa Legas.

Rahoton Zagazola Makama ya nuna cewa hatsarin ya faru ne bayan wata motar da ba a tantance ko wace ce ba ta yi kokarin wuce babbar motar, inda ta goge ta a gefe.

Majiyoyin ‘yan sanda sun bayyana cewa hakan ya sa direban babbar motar ya rasa iko da ita, kafin motar ta kife.

Rahoton ya ce direban babbar motar da wasu mutane 13 da ke cikinta sun mutu nan take.

An ce ‘yan uwan wadanda suka mutu sun gano gawarwakin nasu, sannan aka sallami wadanda iyalansu suka karba domin yi musu jana’iza bisa tsarin addinin Musulunci.

Sai dai an kai gawarwakin wasu mutane 2 da ba a tantance ko su waye ba dakin ajiye gawarwaki na Babban Asibitin Kontagora.

Rahoton ya kara da cewa daga bisani an gano motar da ake zargin ta yi yunkurin wuce babbar motar a Kaboji, cikin karamar hukumar Magama, inda aka kai ta ofishin rundunar ‘yan sanda na shiyya.

Sai dai direban motar ya tsere kuma har yanzu ba a kama shi ba.

Rundunar ‘yan sandan Jihar Neja ta tabbatar da cewa ana ci gaba da gudanar da bincike domin gano hakikanin yadda hatsarin ya faru da kuma kama direban da ya tsere.

Loading

Signing-in 3 seconds...

Signing-up 3 seconds...